Ֆլորիդայում սեռական ճանապարհով Զիկա վիրուսի փոխանցման առաջին դեպքն է գրանցվել
Ֆլորիդա նահանգի (ԱՄՆ) առողջապահության դեպարտամենտը հայտարարել է սեռական ճանապահով Զիկա վիրուսի փոխանցման առաջին դեպքի մասին:
«Ֆլորիդայի առողջապահության դեպարտամենտը հայտարարում է, որ Պինելաս շրջանում հաստատվել է Զիկա վիրուսով վարակվելու՝ 2017 թվականի առաջին դեպքը: Ֆլորիդայում որեւէ տեղ մոծակների խայթոցի միջոցով վիրուսի փոխանցման որեւէ ապացույց չկա»,- ասված է մամուլի հաղորդագրությունում:
Հաղորդվում է, որ Պինելասի բնակիչներից մեկի մոտ, որը վերջերս է վերադարձել Կուբա ուղեւորությունից, վիրուսով վարակվելու ախտանշաններ են ի հայտ եկել: Ընդ որում, դեպարտամենտի տվյալներով, նրա սեռական զուգընկերոջ մոտ, որը չի հեռացել երկրից, վիրուսի թեստը նույնպես դրական է եղել:
2016 թվականի օգոստոսին ԱՄՆ-ի հիվանդությունների վերահսկողության եւ կանխարգելման կենտրոնը հաղորդել էր երկրում սեռական ճանապարհով Զիկա վիրուսի փոխանցման առաջին դեպքի մասին:
Զիկա տենդը կապիկների սուր ինֆեկցիոն հիվանդություն է, որը մոծակների միջոցով երբեմն փոխանցվում է մարդուն եւ բնութագրվում է բարորակ ընթացքով տենդով: Վիրուսն առավել վտանգավոր է հղի կանանց համար, ինչն ուղեկցվում է պտղի միկրոցեֆալիայով:
