Զինվոր կորցրած մայրերի վերարտադրողական առողջության ծախսերն ամբողջությամբ կփոխհատուցվեն
ՀՀ կառավարությունը հավանության արժանացրեց պաշտպանության մարտական գործողություններին մասնակցելիս կամ հակառակորդի հետ շփման գծում մարտական հերթապահություն, կամ հատուկ առաջադրանք, կամ ծառայողական պարտականություններ կատարելիս զոհված (մահացած) զինծառայողների ծնողների վերարտադրողական առողջության աջակցման միջոցառումը հաստատելու մասին նախագիծը: Այն մշակվել է ՀՀ աշխատանքի և սոցիալական հարցերի նախարարության կողմից:
«Արմենպրես»–ի հաղորդմամբ, ՀՀ աշխատանքի և սոցիալական հարցերի նախարար Նարեկ Մկրտչյանը նշեց, որ նախագծով առաջարկվում է վերջիններիս տրամադրել ամբողջական փոխհատուցում` վերարտադրողականության օժանդակ տեխնոլոգիաների կիրառմամբ փոխնակ մոր, դոնորական ձվաբջջի համար դոնորի (դոնորների) ծառայություններից օգտվելու համար։
Անդրադառնալով հարցին՝ ՀՀ վարչապետ Նիկոլ Փաշինյանը նշեց, թե տարբեր շփումների ընթացքում ազդակներ են ստացել այն մասին, որ կա ակնկալիք կառավարության կողմից ֆինանսավորման ավելացման ուղղությամբ:
«Այս որոշումներին մոտեցել ենք փուլ առ փուլ: Ծնողների հետ քննարկումների, տարբեր շփումների արդյունքում ստացված տեղեկատվության հիման վրա ենք որոշում կայացրել: Դա արել ենք այն ժամանակ, երբ համոզվել ենք, որ իրենք են նախաձեռնողը, իրենք են բարձրացնում այս հարցը»,- ասաց վարչապետը:
ՀՀ առողջապահության նախարար Անահիտ Ավանեսյանը նշեց, որ փուլ առ փուլ մեծացվում է այս ուղղությամբ ծառայությունների հասանելիությունը: Նա տեղեկացրեց, որ արդեն 2021 թվականին զինվոր կորցրած մայրերից 27-ի մոտ գրանցվել է հղիություն:
