Նորածնային ակնե․ ինչո՞վ է տարբերվում այն ալերգիայից և արդյո՞ք բուժվում է

Մայրիկները բավականին ուշադիր են նորածինների մաշկի նկատմամբ ու մաշկի կարմիր երանգավորմամբ ցանկացած փոփոխություն, որպես կանոն, համարում են ալերգիկ դրսևորում՝ կարծելով, որ պատճառն իրենց ոչ ճիշտ սննդակարգն է։ Մինչդեռ, դա կարող է լինել սովորական նորածնային ակնե, որը հանդիպում է բալիկների 20-30%-ի մոտ։

Նորածնային ակնեի առաջացումը կապվում է հղիության ընթացքում մորից երեխային փոխանցված հորմոնների հետ։ Նորածնի մեծանալուն զուգահեռ հորմոնները նպաստում են ճարպի առատ արտադրմանը, ճարպագեղձի ծորանի խցանմանը և բորբոքման զարգացմանը։ Ալերգիայից ակնեն տարբերակելու համար պետք է իմանալ, որ ակնեն տարածվում է հիմնականում գլխի մազածածկի, դեմքի՝ այտերի, քթի ու ճակատի, պարանոցի հատվածում, նաև կրծքավանդակին։ Ալերգիկ ցանավորումը չունի հստակ տեղակայում․ ընդգրկում է կրծքավանդակը, որովայնը, վերջույթները, երբեմն ուղեկցվում է այտուցով։ Ակնեի պարագայում տեսնում ենք կարմիր եզրագծերով սպիտակ բշտիկներ, որոնք անհետանում են կյանքի 2-3-րդ ամիսների ընթացքում։ Բալիկին ակնեն չի անհանգստացնում՝ ի տարբերություն ալերգիկ բնույթի ցանավորման, քանի որ վերջինիս դեպքում դիտվում են քոր բերող մեծ, կարմիր հետքեր։

Նորածիների շրջանում արձանագրվող ակնեն չի համարվում ախտաբանություն, հետևաբար որևէ բուժում չի ենթադրում։ Պետք է ուղղակի ամեն օր լողացնել բալիկին գոլ ջրով, մեղմորեն չորացնել մաշկը, չփորձել մեխանիկորեն մաքրել բշտիկները, խուսափել լոսյոնների և յուղերի օգտագործումից դեմքի հատվածում։ Մեծամասամբ վիճակն անցնում է ինքնուրույն, առանց բարդությունների։ Եթե ծնողը նկատում է բշտիկի տեսքի փոփոխություն, ինչն ուղեկցվում է փոքրիկի անհանգստությամբ, այդ ժամանակ պարտադիր է զրուցել մանկաբույժի հետ, անհրաժեշտության դեպքում ստանալ մաշկաբանի խորհրդատվության։

impoqrik.am