Ձվարանների կիստա
Ձվարանների կիստան հեղուկով լցված բշտիկ է, որը զարգանում է ձվարանի վրա կամ ներսում:
Որոնք են ձվարանի կիստայի առաջացման պատճառները
Ձվարանի կիստաներն առաջանում են նորմալ ձվազատության ընթացքում: Ձվազատմանը նախորդող օրերի ընթացքում գոյանում է բշտիկ, որն աստիճանաբար մեծանում է: Այն կրում է ձվաբջիջը: Նորմայում, բշտիկը պայթում է, և ներսում գտնվող ձվաբջիջն ընկնում է որովայնի խոռոչ: Սակայն, որոշ դեպքերում բշտիկը չի պայթում, և հեղուկը, մնալով բշտիկի մեջ, դառնում է կիստա: Ձվարանի կիստան սովորաբար անհետանում է առանց բուժման ՝ 2-3 ամսվա ընթացքում: Կիստաները բավականին տարածված են վերարտադրողական տարիքի կանանց շրջանում և գրեթե չեն հանդիպում դաշտանադադարից հետո: Կիստան սովորաբար լցված է լինում հեղուկով: Սակայն կան կիստաներ, որոնք պարուննակում են արյուն կամ պինդ հյուսվածք:
Որոնք են ձվարանի կիստայի ախտանշանները
Կանանց մեծամասնության մոտ կիստաները մնում են աննկատ և կանայք չեն էլ իմանում դրանց գոյության մասին: Դրանք սովորաբար հայտնաբերվում են պատահականորեն՝ գերձայնային հետազոտության ժամանակ: Ախտանշաններ սկսում են զարգանալ միայն այն դեպքում, երբ մեծացած կիստան սկսում է ճնշել հարևան օրգանները, արյունահոսել կամ ոլորվել: Ձվարանների կիստայի դեպքում կարող է դիտվել.
- ցավեր կոնքի շրջանում՝ բութ և մշտական բնույթի
- ցավ սեռական հարաբերության կամ աղիների դատարկման ժամանակ
- անկանոն դաշտան՝ սովորականից ավելի երկար կամ կարճ, կամ դաշտանի բացակայություն
- որովայնի փքվածություն:
Կիստայի ոլորվելու կամ պայթելու դեպքում հնարավոր է.
- հանկարծակի ուժեղ և սուր ցավ որովայնում
- սրտխառնոց և փսխում:
Ձվաբջջի զարգացման փուլերը դաշտանային ցիկլի ընթացքում:
Յուրաքանչյուր ամիս ձվարաններում միաժամանակ սկսում են զարգանալ մինչև 10-12 ձվաբջիջներ, սակայն միայն մեկն է դառնում գերակշռողը: Այն աստիճանաբար մեծանալով, պատռում է իրեն պատող բշտի պատը, ընկնում է որովայնի խոռոչ, ապա արգանդափողերով անցնում է դեպի արգանդ:
Ինչպես են բուժում ձվարանի կիստան
Ձվարանի կիստան որոշ տեսակներ կարող են ահետանալ առանց որևէ բուժման, սակայն Դուք պետք է պարբերաբար հետազոտվեք: Կախված Ձեր տարիքից, կիստայի տեսակից և չափերից Ձեր բժիշկը կարող է առաջարկել դեղորայքային բուժում կամ վիրաբուժական միջամտություն:
Երբեմն կիստան կարող է ոլորվել, պատռվել, արյունահոսել կամ դառնալ չարորակ նորագոյացություն: Անմիջապես դիմեք բժշկի՝ որովայնում առաջացած հանկարծակի սուր ցավերի դեպքում:
Ինչպես կանխել ձվարանի կիստան
Եթե Ձեզ մոտ հաճախակի են դիտվում ֆունկցիոնալ կիստաներ, և Դուք հղիանալու մտադրություն չունեք, ապա նոր կիստաների առաջացումը կարելի է կանխել բժշկի կողմից նշանակված համապատասխան բուժման, ինչպես նաև հակաբեղմնավորիչ հաբերն ընդունելու միջոցով:
Ապրեք առողջ…
Պատրաստեց՝ Լ. Բունիաթյան