Մարզերում կունենանք պալիատիվ խնամքի ծառայություններ
Հաշվետու ասուլիսի ընթացքում ՀՀ առողջապահության նախարարի տեղակալ Սերգեյ Խաչատրյանը ներկայացրել է բժշկական օգնության ծառայությունների որակի և հասանելիության ապահովման ուղղությամբ շարունակվող ծրագրերին, ինչպես նաև նոր ուղղություններին, մասնավորապես` պալիատիվ բուժօգնության և տարեցների խնամքի ծառայությունների զարգացմանը։ Բանախոսը կարևորել է այդ ծառայությունները բոլոր մարզերում ներկայացված լինելու ուղղությամբ տարվող ակտիվ աշխատանքները։ Նախատեսվում է մինչև տարեվերջ բոլոր մարզերում ունենալ նման ծառայություններ։
Փոխնախարարը կարևորել է հեպատիտ Ց-ով շուրջ 1000 հիվանդի ժամանակակից արդյունավետ դեղերով բուժման թիրախային ծրագրի հանրային առողջապահական նշանակությունը։
«Բացի ներկրված լավագույն, թանկարժեք դեղերով հիվանդների լիովին բուժումը, ծրագիրը լուրջ դերակատարություն ունի հիվանդության տարածվածության կանխարգելման գործում»,-ասել է Սերգեյ Խաչատրյանը։
Փոխնախարարը ներկայացրել է վարակիչ և ոչ վարակիչ հիվանդությունների կանխարգելմանն ուղղված ծրագրերին ու ձեռքբերումներին։ Շեշտվել է, որ վարակիչ հիվանդությունների կառավարման, համաճարակաբանական հսկողության, պատվաստումների որակի և անվտանգության բարելավման, ինչպես նաև պատվաստումների բարձր ընդգրկվածության արդյունքում մահացության ընդհանուր կառուցվածքում վարակիչ հիվանդություններից մահացությունը չի հասնում 1%-ի։ Սերգեյ Խաչատրյանը տեղեկացրել է, որ տարեվերջին կներդրվի արգանդի պարանոցի քաղցկեղը կանխարգելող մարդու պապիլոմավիրուսային պատվաստանյութը։
Անդրադառնալով դեղերի ոլորտին` Սերգեյ Խաչատրյանը նշել է, որ «Դեղերի մասին» ՀՀ նոր օրենքի ընդունումից հետո նոր կարգավորումների` նորմատիվային ակտերի ընդունման գործընթաց է սկսվել։ Այժմ շրջանառության մեջ են դրվել դեղերի գրանցման, ներմուծման և արտահանման, մեկ միասնական ձևաչափով դեղատոմսերի դուրս գրման ու դեղերի բացթողնման կարգերը։